O alcalde de Vigo, Ventura Pérez Mariño, convocará de forma inmediata os membros interesados en conformar a área metropolitana, para o que será necesaria unha vontade política de cara a impulsar esta entidade intermunicipal baseada en criterios fundamentalmente socioeconómicos. Pérez Mariño tomou esta decisión no transcurso da entrevista co presidente da Xunta de Galicia, Manuel Fraga.
O concelleiro de Patrimonio Histórico, Xosé Carlos Arias, asiste o xoves 4 de xullo ás 17:00, á inauguración do "VI Encontro de embarcacións tradicionais de Galicia" que se celebra do 3 ao 6 de xullo na Illa de Arousa.
O Premio Alecrín, concedido á cantante Cristina del Valle, entregarase o 12 de xullo na Estación marítima de Vigo no transcurso dunha cea. O Premio Alacrán seralle enviado por correo á destinataria, a directora do Instituto de la Mujer. As reservas para a cea poderán facerse no teléfono 986 439 459 ata o 7 de xullo.
A Concellería de Cultura organiza a exposición "Toscana Fauve" do artista italiano Pietro Chiaramonte. Os 19 óleos que representan paisaxes da Toscana, espidos e naturezas mortas poderanse ver do 4 ao 27 de xullo na Casa Galega da Cultura.
A Vigo Cup, o Torneo Internacional de Fútbol Base que se disputa desde o pasado luns en Vigo, entra xa na súa recta definitiva. Pecháronse os cadros de equipos que xogarán xa os oitavos de final en todas as categorías, desde benxamíns ata xuvenís.