En 2025 recolléronse en Vigo máis de 543 toneladas de residuos de aparellos eléctricos

O Concello de Vigo continúa reforzando a recollida selectiva de residuos de aparellos eléctricos e electrónicos (RAEE) a través dos distintos servizos municipais habilitados na cidade, consolidando un modelo de xestión cada vez máis empregado pola cidadanía e fundamental para avanzar cara unha economía máis circular e sostible.

Durante o ano 2025 recolléronse en Vigo un total de 543 toneladas de residuos de aparellos eléctricos e electrónicos de orixe domiciliaria a través do servizo porta a porta, o punto limpo fixo e os puntos limpos móbiles distribuídos por distintos barrios da cidade. No primeiro trimestre de 2026 xa se recolleron máis de 163 toneladas de RAEE e as estimacións apuntan que, ao remate do ano, poderían superarse as 650 toneladas recollidas entre os distintos servizos habilitados.

Do total recollido, 210.280 quilos corresponderon ao servizo porta a porta, 295.696 quilos ao punto limpo fixo e 37.081 quilos aos puntos limpos móbiles. Os residuos máis frecuentes continúan sendo os grandes electrodomésticos, como neveiras, lavadoras ou fornos, ademais de monitores e pantallas.

Os datos rexistrados nos últimos anos evidencian un uso crecente deste servizo, especialmente no caso da recollida porta a porta e do punto limpo fixo, dúas modalidades cada vez máis coñecidas e empregadas polos veciños e veciñas de Vigo para xestionar correctamente este tipo de residuos.

Todos os residuos recollidos a través destes servizos son trasladados posteriormente a plantas especializadas para a súa correcta reciclaxe e tratamento, algo que resulta fundamental para evitar impactos ambientais e favorecer a recuperación de materiais reutilizables. Ademais, nos últimos anos incrementouse a substitución de electrodomésticos por novos modelos máis eficientes enerxeticamente, favorecendo unha maior demanda deste tipo de servizos de recollida selectiva.