As obras de humanización da estrada Clara Campoamor estarán rematadas en xuño
O alcalde visitou esta mañá a construción das novas beirarrúas da estrada Clara Campoamor, entre as rotondas de Ramiro Pascual e do Hospital Álvaro Cunqueiro, infraestruturas que facilitarán a mobilidade peonil.
Abel Caballero destacou a transformación na estrada Clara Campoamor coas obras de humanización que conlevan a construción de novas beirarrúas, así como a renovación dos servizos nas proximidades do Hospital Álvaro Cunqueiro. Recalcou que facilitan a mobilidade peonil ao centro sanitario dos veciños de Beade e Valladares.
A humanización actual comprende medio quilómetro de paseo entre as rotondas de Ramiro Pascual e do Hospital Álvaro Cunqueiro. Na zona próxima ao río, o Concello construirá e fortalecerá un muro de 250 metros para evitar un eventual afundimento, explicou o alcalde.
O proxecto, que conleva un investimento de 1,2 millóns de euros, proporciona accesos mellorados aos propietarios das vivendas unifamiliares ubicadas no tramo do vial rehabilitado.
O alcalde avanzou que, finalizada a construción do tramo entre as dúas rotondas, o Concello seguirá mellorando a contorna co asfaltado do vial e coa instalación dunha varanda de ferro na marxe dereita da calzada para garantir a seguridade dos peóns. “De novo, o concello humanizando e facendo unha obra tan importante, que tiña que facer a Xunta”, remarcou o rexedor.