Vigo, sede da celebración dos actos centrais do Día da Policía Nacional

A Dirección Xeral da Policía elixiu a cidade de Vigo como sede da celebración dos actos centrais do Día da Policía Nacional, a festividade dos Santos Anxos Custodios, que terán lugar entre os días 25 de setembro e 2 outubro. Tódalas actividades prevén a participación cidadá e o acto central desenvolverase o día 2 de outubro na Avenida García Barbón.

A presentación do programa fixérona este venres no Concello o alcalde e o director xeral da Policía, Francisco Pardo, que agradeceu a Abel Caballero a súa colaboración para que se celebre nesta cidade o patrón da Policía Nacional e destacou que “o afecto de Vigo constitúe un gran estímulo para seguir cumprindo a misión constitucional de protexer os dereitos e liberdades da cidadanía e contribuír a que España sexa un dos países máis seguros do mundo”.

O rexedor amosou a “honra da cidade” por acoller esta celebración e puxo en valor o traballo que realiza a Policía Nacional que “xoga un papel determinante” engadindo que para un alcalde “o máis importante é que a súa cidade sexa segura”.

Na presentación participaron tamén o delegado do Goberno en Galicia, Pedro Blanco, e o director adxunto operativo da Policía, José Ángel González.

Durante unha semana, Vigo será a sede dunhas celebracións que reflicten a historia da Policía, a súa evolución ao longo dos seus 201 anos de historia e de como se transformou nunha Policía moderna e eficaz, preparada para prestar servizo cidadá.

Actos previstos na cidade

- Exposición de Medios e Museo da Policía. O xoves 25 de setembro será cando se inaugure a “Exposición de Medios”, situada xunto aos xardíns de Montero Ríos, onde os visitantes poderán coñecer de primeira man algúns dos vehículos e medios aéreos policiais máis emblemáticos, xunto cunha ampla e variada selección do material usado polas diferentes unidades da Policía Nacional: Unidade Aérea da Policía, UIP, GEO, TEDAX-NRBQ, Subsolo e Protección Ambiental, Unidade Especial de Cabalería e Guías Caninos. Tamén estarán presentes a División de Cooperación Internacional, Participación Cidadá, a Unidade Central de Seguridade Privada, a Brigada Móbil-Policía no Transporte, Telecomunicacións, Estranxeiría e Fronteiras, a División de Formación e Perfeccionamento, a División de Documentación, Policía Científica e o Servizo de Financiamento Europeo.

Na exposición tamén estará presente o Servizo de Armamento, que instalará unha galería de tiro virtual que poderán utilizar todos os cidadáns que se animen a participar. Para os máis pequenos instalarase un circuíto no que poderán experimentar a sensación de conducir un coche de policía a bordo de vehículos eléctricos uniformados.

A mostra poderá visitarse en horario de mañá e tarde (de 11 a 14 horas e de 17.30 a 20.30 horas) entre os días 25 de setembro e 1 de outubro e ata as 14:30 o día 2 de outubro.

- Concerto didáctico na Sede Afundación Vigo. A Sede Afundación Vigo acollerá ás 11:30 horas do día 26 un concerto didáctico que ofrecerá a Banda de Música da Policía Nacional. Durante o “Concerto Didáctico en Familia: Música e Policía”, maiores e pequenos gozarán da música dunha forma amena e divertida, unha actividade coa que se pretende incrementar o coñecemento da Policía a través da música.

- Exhibición policial e ciclo de conferencias. O sábado 27 de setembro ás 11:00 horas, no auditorio de Castrelos, situado no parque de Castrelos, terá lugar unha exhibición policial na que participarán diferentes unidades: UIP, UPR, GEO, TEDAX-NRBQ, Guías Caninos, Cabalería e a Unidade Aérea da Policía Nacional.

Durante as tardes dos días 29 e 30, a Sede Afundación Vigo acollerá o ciclo de conferencias, que, como todos os anos, tratarán asuntos específicos da vida da Policía Nacional.

-Gala Premios Policía Nacional. O día 1 de outubro ás 19:00 horas terá lugar a Gala de Premios Policía Nacional no Teatro García Barbón. Durante esta gala entregaranse os Premios de Xornalismo e o Premio Valores Humanos, convocados pola Fundación Policía Española.

Nos Premios de Xornalismo, outorgaranse galardóns a aqueles traballos que analizaron o labor realizado pola Policía Nacional para os cidadáns e consideraranse tres categorías: xornalismo escrito e dixital, xornalismo audiovisual e xornalismo radiofónico. Día 2 de outubro, acto central do Día da Policía O 2 de outubro ás 11:30 horas terá lugar o acto central do Día da Policía na avenida García Barbón de Vigo.

Durante o evento impoñeranse as condecoracións ao mérito policial tanto a integrantes da Policía Nacional como a persoas que contribuíron de forma destacada na mellora da imaxe policial. Ademais distinguirase a integrantes doutras Forzas e Corpos de Seguridade e mencións honoríficas a cans que prestan servizo na Unidade de Guías Caninos da Policía Nacional. Durante o evento levará a cabo o acto “in memoriam” en honra aos axentes falecidos en acto de servizo e unha formación dinámica de unidades motorizadas, que abrirá e pechará a Unidade Aérea da Policía, mostrará os vehículos policiais das distintas unidades a todos os asistentes.