Concello e Universidade crearán o Observatorio da Vivenda de Vigo
O rexedor tamén informou do establecemento dunha nova clasificación de actividades no padrón da taxa de lixo comercial do ano 2025, no que “as vivendas turísticas cotizarán como actividade do sector terciario”.
“Iniciamos xa a tramitación dun convenio de colaboración coa Universidade para a creación do Observatorio da Vivenda de Vigo”, explicou esta mañá Caballero. Indicou que o Concello había encargado un estudo externo para a posible declaración de zona de mercado tensado na cidade, na que se establecía como recomendación a creación de dito observatorio.
Ten como obxectivo facer un diagnóstico da situación da vivenda en Vigo e a súa área metropolitana, tratando de estudar conxuntamente a evolución do mercado da vivenda e analizar o acceso cidadán a unha vivenda digna a un prezo razoable. O rexedor indicou que “estudaremos tamén as diferenzas entre os barrios no acceso á vivenda e analizaremos o stock de vivendas, o custo da vivenda e a situación do mercado de alugueiro”. O Observatorio deberá elaborar:
- Mapas de situación e comparativas con outras cidades e coa contorna de Vigo
- Propostas de mellora
- Zonificacións con limitación de usos
- Avaliación das políticas realizadas polas diferentes administracións públicas
Padrón do lixo comercial 2025
A Xunta de Goberno Local aprobou o padrón da taxa de lixo comercial do ano 2025, por un importe de 4.515.121 euros. O alcalde indicou que “as vivendas turísticas cotizarán como actividade do sector terciario”, tras explicar que “establecemos unha nova clasificación de actividades”, partindo de estudos de campo e experiencias doutros ámbitos territoriais.
A nova clasificación determina 18 categorías, entre elas, as vivendas turísticas, onde se engloban as vivendas dedicadas a servizos de pernoita. A xeración de residuos destes produtores presenta categorías intermedias entre o aloxamento común e o aloxamento sen restauración.