O Concello aumenta en 200.000 euros o presuposto das axudas de emerxencia que alcanzan 1.400.000 euros
A Xunta de Goberno Loacal acordou este venres ampliar en 200.000 euros o orzamento das axudas de emerxencia. Así o anunciou Abel Caballero ao explicar que a dotación económica para 2024 ascende a 1.400.000 euros. “Eu dixen que as axudas terán recursos ilimitados e, por tanto, terán tantos recursos como se necesiten, dependendo das solicitudes que se fagan”, afirmou.
Abel Caballero anunciou a decisión do goberno local de aumentar as axudas de emerxencia ás familias ao pasar o orzamento de 2024 de 1.200.000 euros a 1.400.000. “Se no próximo mes vísemos que aínda se necesitan máis recursos, aumentarémolos inmediatamente”, asegurou.
O rexedor explicou que o Concello adxudicou nos primeiros nove meses do ano un total de 3.306 subvencións por un importe de 1.117.636 euros.
O alcalde incidiu en que as axudas de emerxencia son unha forma “áxil, eficaz e obxectiva de prestar axuda de forma inmediata ás persoas que o necesitan”. Recordou que, co sistema anterior, este proceso estaba suxeito aos orzamentos de cada exercicio “e, por tanto, se aparecía unha necesidade a metade de ano xa non se podía cubrir”.
Coas axudas de emerxencia “cubrimos todas as necesidades urxentes”, apuntou Caballero ao incidir no traballo que desenvolve o Concello en toda a área de Política Social, cos programas de apoio aos maiores, o servizo de canguros, os coidadores de barrio, o apoio ás familias vulnerables, ou o albergue, entre outros, “nunha forma extraordinaria de facer política social.