O Marco oferta formación para público adulto en historia do cine e da arte
“Afectos especiais. A linguaxe do cinema e a súa potencia expresiva” e “Arte e sociedade na España dos séculos XX e XXI” abren o prazo de inscrición o martes 17 de setembro.
Abel Caballero informou este xoves da oferta formativa que comezará o Museo de Arte Contemporánea entre os meses de outubro e maio de 2025, con periodicidade semanal para público adulto.
“Arte e sociedade na España dos séculos XX e XXI” é o curso de Historia da arte, que abordará a arte española dos últimos 100 anos, impartido por Ana Pereira Molares, doutora en Historia da Arte. Impartirase do 23 de outubro ao 30 de abril 2025, cada mércores entre as 19.00 e as 20.30 horas.
“Afectos especiais. A linguaxe do cinema e a súa potencia expresiva” será impartido entre o 17 de outubro e o 29 de maio 2025, tódolos xoves de 19.15 a 20.45 horas. José Manuel López (doutor en Comunicación e profesor da Uvigo instruirá sobre a Historia do Cinema centrándose nas posibilidades da linguaxe e os recursos cinematográficos, na súa potencia emotiva e expresiva.
O prazo de matrícula abre o vindeiro martes 17 con prazas son limitadas e descontos para o alumnado da Universidade de Vigo e para os membros da Agrupación Amigos do Marco. Toda a información está na web www.marcovigo.com.