A exposición permanente de Fernández del Riego, renovada para lembrar a figura do intelectual galeguista
A presenza “perenne” en Vigo da figura e a obra do intelectual galeguista Francisco Fernández del Riego vese reforzada coa reapertura, este martes, do museo instalado na primeira planta da Casa da Cultura Galega. Así o remarcou o alcalde ao destacar que Don Francisco foi “un personaxe excepcional, cunha visión cultural inesgotable”, o que leva ao Concello a reafirmar o seu compromiso en seguir destacando a súa personalidade e contribución á cultura galega.
Abel Caballero, acompañado do concelleiro de Cultura, Gorka Gómez, presidiu hoxe a reapertura do Museo Francisco Fernández del Riego, onde reafirmou a vocación do Concello de Vigo por seguir traballando para destacar o peso do intelectual galeguista.
“Queremos que Francisco Fernández del Riego ocupe un lugar perenne en Vigo, non só pola praza que leva o seu nome e pola pinacoteca, senón neste edificio, porque era a súa casa de verdade”, afirmou hoxe o alcalde ao incidir en que “canto máis se afonda na súa obra e na súa vida máis riqueza se atopa”.
Ante Beatriz Liz de Cea, comisaria da nova exposición do museo, e José Ballesta, director do museo “Quiñones de León”, Caballero insistiu en que o goberno local quere “seguir coa man tendida de cooperación con todo o que significa a figura de Fernández del Riego, desde todos os espazos dun galeguista ilustre, con esta visión cultural inesgotable”.
Remodelación
Beatriz Liz de Cea destacou o esforzo realizado polo Concello por remozar totalmente o espazo da primeira planta da Casa da Cultura Galega para acoller a exposición coa obra do "polifacético" intelectual e converter ao museo nun espazo do século XXI.
