O alcalde afirma que a praza de Vialia se converteu no novo centro de gravidade de Vigo
Abel Caballero asegurou este martes que o espazo configurouse como novo “centro de gravidade” cambiando “o concepto de Vigo e a forma de entender a cidade”. Así o afirmou tras asinar, coa directora xeral de Nhood España, Teresa Verdugo, o convenio con Ceetrus Urban Player Spain que converte ao Concello en titular dos 21.904 metros da praza durante 50 anos, e fixa a repartición dos custos do mantemento conxunto entre a administración municipal e a empresa privada. “Isto é moi conveniente para o Concello e aseguramos que estea en perfecto estado”, indicou.
O rexedor, acompañado polos concelleiros Ángel Rivas, Patricia Iglesias e Nuria Rodríguez, puxo en valor o “cambio marabilloso” e cara á modernidade que representa para Vigo a praza de Vialia durante a firma do convenio de colaboración asinado con Ceetrus Urban Player Spain polo que o Concello convértese en propietario do espazo e asume o mantemento conxunto coa concesionaria durante 50 anos. “Con isto garantimos que a calidade se mantén”, argumentou.
Caballero remarcou a transformación proporcionada durante o seu mandato á zona ferroviaria, onde se construíu o edificio deseñado por Thom Mayne, “un dos cinco mellores arquitectos da historia da humanidade”, que integra os principais sinais de identidade da cidade. “Esta é unha das grandes edificacións arquitectónicas de Europa” asegurou, ao remarcar que, coa intervención, “o corazón da cidade transformou un inmenso buraco negro nunha praza marabillosa” de 500 metros e no punto de confluencia todos os días de miles de persoas, que, ademais, é accesible desde un importante número de rúas da cidade. “Onde antes había un buraco agora hai un paseo con máis xente que na rúa do Príncipe”, incidiu.
Reunión co ministro de Transportes
O alcalde explicou que, tras a reunión mantida o luns con Óscar Puente, fixou un próximo encontro co ministro de Transportes para abordar as dificultades para atopar un billete de tren como consecuencia de que o servizo ferroviario “vai extraordinariamente ben”.
Caballero reivindicou que “Vigo necesita a gratuidade da autoestrada AP-9 para seguir potenciando” a economía da cidade, a mobilidade e a afluencia de visitantes.
