O Concello organiza as xornadas formativas “As políticas públicas de Igualdade”

A tenente de Alcaldía, Carmela Silva, concelleira delegada da Área de Patrimonio e Igualdade, explicou este luns o desenvolvemento das xornadas que se enmarcan no “amplísimo calendario de actividades a prol da igualdade” que o goberno municipal ten organizado durante este mes de marzo e animou a mulleres e homes a participar.

A Sala de Conferencias de Afundación acolle este mércores 20 e o xoves 21 as xornadas “As políticas públicas de Igualdade” que inaugura o alcalde e que contará coa participación de Beatriz Corredor, presidenta de Redeia (Rede Eléctrica de España) e exministra de Vivenda. A continuación, a exconselleira de Vivenda, Teresa Táboas, e a directora da Fundación Española para a Ciencia e a Tecnoloxía, Inma Aguilar, abordarán a “Subrepresentación das mulleres e alianzas estratéxicas para o avance das políticas públicas de Igualdade”.

O xoves 21, a presidenta do Comité para a Eliminación da Discriminación contra a Muller, Ana Peláez, única española nesta entidade, falará sobre a “Actualización sobre o traballo de Nacións Unidade e retos futuros para a igualdade das mulleres no planeta”. Amais, desenvólvese a última mesa redonda sobre “Globalización e igualdade en escenarios complexos” coa intervención da cantante Marilia; a profesora de Filosofía do Dereito, Tasia Aránguez, a directora creativa de Animosa, Rebeca Tenoira e a alcaldesa de Maceda, Uxía Oviedo.

Carmela Silva sinalou que “van ser xornadas de debate sobre todas as cuestións que é necesario implementar da axenda feminista, da man de mulleres con grande representatividade e coñecemento sobre políticas de igualdade para continuar avanzando”.

As persoas interesadas en participar poden inscribirse no correo electrónico: xornadas.igualdade@vigo.org.