O Concello mantén o apoio gratuíto a pemes e autónomos a través de VigoEmprende
Abel Caballero asistiu ao primeiro obradoiro sobre marketing, finanzas e estratexia empresarial que está a desenvolver o programa municipal VigoEmprende. Desde 2020 atendéronse 5.000 servizos a empresas para o apoio na súa implantación e consolidación de negocio así como asesoría fiscal, xurídica ou tecnolóxica.
O Concello de Vigo comezou o programa VigoEmprende 2023-2025 cun obradoiro sobre marketing, finanzas e marketing empresarial. O alcalde visitou aos participantes das máis de 40 empresas inscritas nesta actividade. VigoEmprende ofrece apoio de balde a emprendedores, pemes e autónomos co obxectivo de xerar emprego. Deste xeito, o programa municipal ofrece plans de formación, actividades de networking, asesoría xeral e un plan de difusión empresarial paras as persoas con ideas e iniciativa e así como axuda á consolidación de negocios.
O goberno local investiu nesta nova edición case 300.000 euros para seguir a fomentar o autoemprego e permitir o crecemento dos proxectos máis consolidados. No 2020-2023, o programa ofreceu 5.000 servizos a máis de 1.000 beneficiarios e creáronse 250 empregos. A maior demanda rexistrouse no sector do comercio, servizos profesionais, hostalería, actividades recreativas, inmobiliarias, sanidade, estética e educación.