Escoitar

O próximo domingo principian os concertos II Ciclo de Nadal

mércores, 27 nov 2002
A Concellería de Festas e Animación Sociocultural organiza, en virtude do convenio de colaboración asinado o pasado mes de maio coa Federación de Bandas Populares de Música de Vigo, o II Ciclo de Nadal de concertos, que terán lugar todos os domingos do mes de decembro a partir das 12,00 horas.

Nesta ocasión, o ciclo combinará os concertos no auditorio municipal con actuacións en distintos barrios da cidade, como Travesas (Instituto Santa Irene), Calvario (Escola Oficial de Idiomas) e Teis (Pavillón de Deportes), para o que se conta coa colaboración da recién creada Federación de comercio de Vigo (FECOVI).

O ciclo dará comezo este domingo día 1 coa actuación da Agrupación Musical “Atlántida” de Matamá no Instituto Santa Irene, e da Banda-Escola da UVCD de Candeán no auditorio municipal, ás 12’00 horas, con entrada gratuíta ata completa-lo aforo destes recintos.

Estas dez actuacións do ciclo de nadal veñen a completa-las 120 incluídas no convenio de colaboración existente coas dez bandas populares viguesas e que contemplan concertos ó longo de todo o ano, por todos os nosos barrios.