Escoitar

Axenda 21 Local

O Concelleiro de Medio Ambiente, José Manuel Figueroa, presentou a Axenda 21 Local coa que o goberno municipal inicia un proceso de diálogo cos seus cidadáns, organizacións locais e empresas privadas co fin de aprobar un programa de accións encamiñadas a mellorar a sostenibilidade do seu modelo de desenvolvemento. A Axenda 21 Local, promovida no marco do Eixo Atlántico do Noroeste Peninsular, supón un novo instrumento na Estratexia Global de Calidade Urbana desta organización.

xoves, 22 abr 2004
1082632465axenda21.jpg
Rolda de prensa
A Axenda 21 desenvólvese en 16 dos 18 municipios que integran o Eixo Atlántico: A Coruña, Santiago, Ferrol, Lugo, Monforte de Lemos, Ourense, Vigo, Braga, Bragança, Chaves, Guimarâes, Peso da Régua, Porto, Viana do Castelo, Vilanova de Gaia e Vila Real.

La posta en marcha do proxecto corre a cargo dun equipo de empresas e entidades de diversos ámbitos, que coordinará o Instituto Sondaxe, firma que gañou o concurso convocado polo Eixo Atlántico. A súa implantación, que se realizará en varias fases, dispón de máis de 2,5 millóns de euros financiados con fondos de INTERREG e achegas da Consellería de Medio Ambiente da Xunta de Galicia, da Secretaría de Estado para o Ambiente do Estado Portugués e dos municipios participantes.

Esta iniciativa xurde como desenvolvemento do capítulo 28 do Programa 21 aprobado por 173 Gobernos de todo o mundo durante a Conferencia das Nacións Unidas sobre Medio Ambiente e Desenvolvemento, celebrada en Río de Janeiro en 1992. Este capítulo insta ás autoridades locais a iniciar un proceso de diálogo coa cidadanía para a promoción consensuada de iniciativas que favorezan un modelo de desenvolvemento sostible no ámbito local.

Esta experiencia é pioneira en Europa xa que, por primeira vez, cidades de dous países distintos acometen de forma simultánea o estudio conxunto dos seus problemas e das actuacións de mellora.
Descargar todas as imaxes

Máis información