O alcalde apoia as demandas de persoal do IES Alexandre Bóveda e do Conservatorio Superior de Música
Abel Caballero censurou que a Xunta de Galicia “escatime recursos para o ensino, a educación e a formación na cidade” e trasladou o seu apoio ao IES Alexandre Bóveda que demanda profesorado e ao Conservatorio que perderá dúas prazas de persoal administrativo.
Tal e como explicou o rexedor, o Claustro do IES Alexandre Bóveda de Vigo solicitou á Xunta de Galicia que mellore a dotación de profesorado do centro para o curso 2026/2027, dado que pediron tres docentes e só lles concederon un, o que non lles permite atender as necesidades reais do alumnado.
“Teñen toda a razón e teñen todo o apoio da Alcaldía e da cidade para solicitar máis dotación de profesorado, que é máis calidade da docencia, que é mellor docencia”, apuntou Caballero, engadindo que “a formación é o que os mozas e mozas de Vigo van ser no futuro e polo tanto teñen todo o noso apoio”.
Amais, o alcalde trasladou “todo o seu apoio” ao alumnado e profesorado do Conservatorio Superior de Música de Vigo ante os recortes que quere aplicar a Xunta, reducindo dúas prazas de persoal de administración e servizos, o que na práctica implica que o centro estará aberto menos horas.
“É un edificio que o Concello cedeu á Xunta de Galicia e querémolo ocupado todo o día. É unha demanda xusta e teñen todo o noso apoio”, apuntou o rexedor. “A Xunta ten que deixar de escatimar recursos para o ensino e a educación e a formación na cidade de Vigo e está facéndoo de forma permanente”, rexeitou.