O concello limita a velocidade a 30km/hora, construirá beirarrúas e vixiará a seguridade dos peóns nos accesos ao hospital
Abel Caballero informou este martes das medidas coas que o goberno local quere garantir a seguridade e mellorar o tráfico nos accesos ao Álvaro Cunqueiro, que inclúen a redución da velocidade máxima a 30km/hora en Clara Campoamor, a colocación de bandas redutoras e o reforzo da presenza policial para garantir que se respecta a limitación. Ademais, estúdase a posibilidade de expropiar terreo para construír beirarrúas sen perder espazo de aparcamento e, no centro da cidade, analízanse opcións para aliviar a intensidade circulatoria de vías como a Avenida de Castrelos. Para dar a coñecer itinerarios alternativos, o Concello prepara mapas con recomendacións para condutores da cidade e para os que veñen de fóra.
