O Concello oferta 2600 prazas para viaxes en barco pola ría
A terceira edición dos percorridos didácticos ponse en marcha durante os meses de maio e xuño no marco do programa “Vigo, cidade amiga dos maiores”.
O alcalde avanzou este luns que o goberno municipal retoma as viaxes en barco pola ría dentro do programa “Vigo, cidade amiga das persoas maiores”, co que se ofrecen percorridos didácticos durante os meses de maio e xuño de 2025.
A terceira edición do programa suma 2.600 prazas gratuítas (51 pasaxeiros por barco) e desenvólvese coa idea de amosar “A riqueza das nosas augas; descubrindo a ría de Vigo”. Cunha hora e media de duración, a ruta estará guiada por monitores especializados a bordo dunha embarcación preparada especialmente para a interpretación do medio mariño cunha panorámica de 360º co que a pasaxe poderá coñecer “o ciclo vital do mar”. Para iso, o barco está equipado do dron submarino “Nemo” con cámara 4K, que permitirá descubrir a fauna e flora do fondo mariño.
As inscricións ábrense este mércores 23 de abril a través do teléfono 010 e das asociacións veciñais no caso sas viaxes individuais e coa empresa adxudicataria do programa “Ocean secrets”, no caso das viaxes en grupo.