Vigo recoñece o labor do voluntariado municipal
O acto contará coas entidades colaboradoras e os centos de voluntarios que desenvolven a súa actividade. O alcalde tamén informou que esta semana se concederon 49 axudas de emerxencia por valor de 15.000 euros
O Concello celebra no Auditorio Municipal un acto de recoñecemento polo Día do Voluntariado aos voluntarios municipais. No evento entregaranse un diploma e un pequeno agasallo ás persoas que axudan de xeito altruísta ás persoas que o precisan e nas actividades organizadas desde o consistorio.
O alcalde sinalou que o voluntariado municipal atende a fundacións, asociacións e entidades con centos de voluntarios en distintas áreas, como cultura, deporte, medio ambiente ou turismo. “Agora tamén co Nadal, fan de intermediarios entre a cidade e os habitantes e turistas”, puxo de manifesto.
Axudas de emerxencia
Abel Caballero tamén informou que o goberno local outorgou esta semana 49 axudas de emerxencia cun importe de 15.000 euros, a maioría delas para alimentación e vivenda. O rexedor destacou as axudas para vivenda “porque cando as pagamos evitamos os desafiuzamentos”. Para o rexedor as axudas de emerxencia “son a mellor forma de actuar en política xunto ao resto de programas sociais”.
