O Concello inviste máis de 700.000 euros na mellora da rede de abastecemento e saneamento
A Xunta de Goberno Local vén de aprobar o proxecto de renovación da rede de saneamento da rúa Silvana e a tramitación dos expedientes de renovación do abastecemento de Xulián Estévez e da mellora do saneamento de Sabaxáns.
![](https://xornal.vigo.org/storage/images/opt/SXGpnw4IKBg9Ynd74IJOoBZ5Isc98lMpYccunBsl.jpeg)
Abel Caballero deu conta este venres dos acordos da Xunta de Goberno Local que suman un investimento de máis de 718.000 euros en diferentes obras. Quedou aprobado o proxecto de renovación da rede de saneamento na rúa Silvana, que ten un prazo estimado execución de obras de 5 meses.
Tal e como explicou, a rúa Silvana ten unha acusada pendente, de máis do 10%, e precisa renovar a rede de saneamento que recolle de forma unitaria augas fecais e pluviais “unha herdanza do pasado”. Estas circunstancias ocasionan desbordamentos que afectan ás vivendas lindeiras polo que se instalará unha rede separativa. “Queremos evitar as molestias ás vivendas e facer unha separación ecolóxica e medioambientalmente sostible”, sinalou o alcalde.
As actuacións inclúen a instalación dun novo colector de PVC para augas pluviais e outro para augas residuais, renovando tamén a condución de abastecemento, repoñendo o pavimento do vial e as escaleiras actuais de acceso ás vivendas, dotándoas de varandas e renovando as escaleiras e a rampla situadas na parte alta.
Ademais, a Xunta de Goberno Local deu conta da tramitación do expediente de renovación do abastecemento da rúa Xulián Estévez cuxo proxecto, xa aprobado, ten un orzamento de 332.000 euros e un prazo execución de 5 meses. Nos últimos meses producíronse “serios problemas na rede de abastecemento” de Xulián Estévez e da contorna de Guixar polo que a obra permitirá a renovación da rede de abastecemento, de saneamento e a reposición dos pavimentos afectados.
Quedou visto tamén o expediente de mellora do saneamento da rúa Sabaxáns en Lavadores que, cun orzamento de 61.000 euros e un prazo estimado de execución de 5 meses, “permitirá evitar que o colector actual desborde” en momentos de choivas fortes. Caballero informou dos problemas de capacidade que sofre a rede que recibe augas procedentes da rúa Manuel Álvarez. As obras permitirán solucionar estes problemas cun novo tramo de colector de 125 metros de lonxitude.
A previsión do goberno municipal é que as tres obras comecen no mes de setembro.
Vigo Vertical e humanizacións
Abel Caballero informou esta mañá de tres futuros proxectos, nos que colabora a Deputación de Pontevedra, cun importe total de 6.245.866,88€. Destacou que “seguimos dando pasos importantes” para a realización destas actuacións, que inclúen novos elementos do Vigo Vertical, así como humanizacións.
Como detallou o rexedor: o ascensor entre Jacinto Benavente e Torrecedeira, conta cun importe de 1.148.557,71 €; as ramplas mecánicas na rúa Pintor Colmeiro (entre Álvaro Cunqueiro e Tarragona), que terá unha inversión de 2.826.209,35 € e a humanización de San Roque (entre Gregorio Espino e Ruiseñor), a que se destinarán 2.271.099,82 €.