A Fundación Laxeiro expón debuxos inéditos en papel realizados con pluma estilográfica
“Liña e garabato. Recursos expresivos no debuxo de Laxeiro”, baixo este título desprégase, ata o 13 de outubro, a exposición na Casa das Artes que mostra debuxos inéditos e difíciles de contemplar, porque pertencen a coleccións privadas, así como parte dos fondos da Fundación Laxeiro, que Abel Caballero chama aos vigueses a contemplar porque se trata dunhas obras á "altura dos grandes museos do mundo e dos grandes pintores internacionais".
O alcalde de Vigo destacou hoxe que a “xenialidade” de Laxeiro reflíctese en cada un dos 30 debuxos, realizados coa súa pluma estilográfica en papel, que permanecen expostos na Fundación Laxeiro, situada na Casa das Artes, e especialmente no cadro de gran formato “A vida”, que preside a mostra.
Caballero puxo en valor a exhibición de numerosas obras inéditas expostas que mostran a capacidade do artista de transmitir a expresividade dos rostros, e recalcou que para Laxeiro o debuxo “era fundamental”.
O rexedor animó á cidadanía a visitar a mostra que pon en evidencia a evolución expresiva e artística do creador. “Merece a pena contemplar unhas obras que son difíciles de observar e que mostran a evolución do artista”, recalcou
