A X Ruta dos Pinchos de Teis contará con propostas culinarias de doce establecementos
O alcalde participou este xoves na presentación da décima edición do concurso que se desenvolverá desde o venres 1 de setembro ata o domingo 17 de setembro.
![O rexedor, María Lago, Roberto Giráldez e Orencio Hermida durante a presentación do evento](https://xornal.vigo.org/storage/images/opt/o0dqZFcv2Sy8DsPgmIXwancW9ZyWyq89IBnZt8w0.jpeg)
Abel Caballero referiuse á “calidade excepcional” dos pinchos e puxo en valor a relación calidade-prezo das propostas dos doce establecementos que participan na edición deste ano. Así mesmo, animou a “todo Vigo” a que se achegue a gozar da Ruta dos Pinchos de Teis para probar as delicias gastronómicas e a votar polos seus favoritos.
Na presentación da X Ruta dos Pinchos de Teis celebrada este xoves no Mercado, participaron Orencio Hermida, vicepresidente de Zona Teis Centro Comercial, a concelleira de Turismo, María Lago e Roberto Giráldez, presidente da Federación Vigo Comercio, que destacou a oferta comercial e hostaleira de Teis e agradeceu a colaboración municipal para poder desenvolver esta ruta.
A décima edición da Ruta de Pinchos de Teis celébrase desde este venres, 1 de setembro, ao domingo 17 de setembro, e as propostas serán servidas nos doce locais participantes en horario de 20:00 a 22:30 horas.