O goberno local inicia o seu mandato coa planificación de inversións
Humanizacións, Vigo Vertical, dotacións deportivas e culturais así como o inicio do deseño do futuro Vigo Arena, o recinto que albergará concertos, espectáculos e todo tipo de eventos, son as cuestións que estiveron sobre a mesa na primeira xuntanza do goberno encabezada por Abel Caballero.
Os 19 concelleiros do goberno local mantiveron a primeira xuntanza logo do pleno de organización municipal na que abordaron os primeiro investimentos a desenvolver durante a lexislatura.
O alcalde deu conta do “proxecto ambicioso” a apuntou a cumprir o que dixo na campaña electoral. Deste xeito, Abel Caballero puxo de manifesto que xa encargou comezar a contactar con coñecedores de recintos para albergar concertos, espectáculos e todo tipo de eventos, o que será o futuro Vigo Arena: “Témolo programado e sabemos onde querémolo facer. Queremos ver experiencias doutras cidades de Europa”, manifestou.
O Concello tamén seguirá a humanizar as rúas de Vigo, tamén as das parroquias, na que no primeiro ano de lexislatura o alcalde prevé mellorar ao redor de 70. “Durante a lexislatura faremos ao redor de 400 rúas”, afirmou.
Durante os próximos anos o goberno local tamén cumprirá co deporte, coa remodelación dos vestiarios dos 40 campos de fútbol. Caballero tamén avanzou que “hai prioridade para dous novos pavillóns deportivos de xeito inmediato”.
