Vigo recibe dous millóns de euros para o turismo e comercio de Bouzas
O BOE publica os proxectos aprobados no Plan de Sostenibilidade Turística 2023 aprobados polo Ministerio de Industria, Comercio e Turismo financiados cos fondos europeos Next Generation EU.
Abel Caballero deu conta da publicación no BOE dos plans de sostenibilidade turística aprobados polo Ministerio de Industria, Comercio e Turismo. Bouzas terá unha inversión de dous millóns de euros por parte do Goberno de España a través do Plan de Recuperación, Transformación e Resiliencia dotado cos fondos europeos Next Generation EU.
O alcalde sinalou que estes fondos están adicados á “reactivación de Bouzas como destino turístico, comercial e con novas renaturalizacións por todo o barrio, con novos espazos verdes na zona do paseo”. O proxecto mellorará zonas verdes, recollida porta a porta de residuos, nova iluminación, humanización da rúa do Pazo, promoción dixital de Bouzas e o casco histórico, difusión da festa da Brincadeira para ser Festa de Interese Turístico de Galicia.
Caballero puxo de manifesto o interese turístico que ten a cidade de Vigo e o traballo que está a facer o goberno local para estender a zona de influencia: “Somos unha cidade turística, co Nadal, o resto de festas e o verán. Imos delimitando zonas que permitan a extensión do turismo. Fixémolo co Vialia ampliando a Teis e o Calvario e agora é a quenda de Bouzas”, concluíu.