Abel Caballero celebra a achega do 21% dos Fondos Europeos aos concellos

A asignación de Fondos Europeos Next Generation EU a proxectos impulsados polos gobernos locais ascende a 15.000 millóns de euros, unha cifra que representa “o 21% da cifra total” dos fondos para a recuperación destinados ao noso país e que “supera en case a metade as previsións iniciais do 14%” que demandaba a FEMP”. Así o anunciou Abel Caballero, que mañá martes, 31 de maio, presidirá a reunión da Xunta de Goberno da Federación Española de Municipios e Provincias que se desenvolverá en formato híbrido a partir das 10.15 horas.

Segundo destacou Caballero, esta cantidade distribuíuse en 5.000 millóns destinados ás convocatorias de 2021, outros 5.000 nas xa realizadas en 2022, e 5.000 máis nas convocatorias pendentes. Con estas cantidades, e entre outras áreas de actuación as Entidades Locais están a desenvolver proxectos de axenda urbana, rehabilitación de edificios públicos, creación de Zonas de Baixas Emisións, mobilidade sostible ou eficiencia enerxética, entre outros, “sen deixar de apuntar tamén os PERTES”, lembrou Caballero, que citou os relacionados con vehículo eléctrico, enerxías renovables ou industria naval.

Xunta de Goberno

Na reunión de mañá, ademais das actuacións da FEMP en relación cos Fondos Europeos para a recuperación Next Generation EU, os membros da Xunta coñecerán en detalle os acordos de colaboración que a Federación propón subscribir con Ministerios e organizacións diversas. Así mesmo, prevese aprobar o documento “Medidas para a mellora da eficiencia enerxética nas cidades” e a Declaración Institucional do Día Internacional do Orgullo LGTBI - 28 de xuño.