O goberno municipal inviste 2 millóns de euros na rede de abastecemento e saneamento da cidade
A Xunta de Goberno Local deu conta da tramitación da renovación do abastecemento en Rosal Florido e a súa contorna en Sampaio así como a mellora da EDAR de Bouzas, dous proxectos que suman dous millóns de euros de orzamento.
O alcalde puxo en valor este investimento do seu goberno para mellorar a calidade do servizo de saneamento e abastecemento da cidade.
As obras de renovación do abastecemento na rúa Rosal Florido e a súa contorna en Sampaio, enmarcada no Plan de investimentos do Concello ten un orzamento superior ao millón de euros e un prazo de execución de sete meses. “Hai unhas redes de abastecemento desastrosas”, explicou o rexedor, que serán substituídas por novas tubaxes de diámetro superior que permitirán “máis presión e capacidade de abastecemento de auga potable”. Amais, o proxecto contempla un sistema de rede reticulada onde a auga pode chegar no momento da demanda a través de varios circuítos de xeito que se hai unha avaría nun sitio concreto a auga chega por outras vías, o que supón “unha mellora singular do servizo”.
A mellora da rede de abastecemento en Rosal Florido inclúe as rúas da contorna: Casal, Codo, Escalinata, Camiño Langarangana, Calexón, Camiño Carballeira, Subida a Igrexa e outras.
No tocante ás obras de mellora da estación de bombeo de augas residuais de Bouzas”, teñen un importe de 716.000 euros e un prazo de execución de 3 meses para unha “estación moi vella á que lle toca a renovación”, xa que data de 1996 e nestes momento é “calamitosa”, en palabras do alcalde, dado o tempo transcorrido desde a súa construción. Así, serán renovados os equipos mecánicos, a caldeirería e mellorarase o pozo de bombeo. Ademais, dotarase das instalacións necesarias para evitar as avarías e evitar que os alivios se realicen cara a ría, “teñen que ser todos para a depuradora”, polo que “estamos dedicando estes 700.000 euros a seguir coidando da ría de Vigo”.