Os cemiterios municipais, abertos desde este xoves coas limitacións do estado de alarma

O alcalde anunciou que desde este xoves pola mañá os cemiterios municipais están abertos ás visitas da cidadanía, condicionadas á lei e á norma estatal vixente nestes momentos que as limita a un desprazamento dentro dun quilómetro de distancia do domicilio, igual que ocorre cos paseos por praias ou parques.

Abel Caballero amosouse confiado na posibilidade de que esta situación cambie o luns cando “poidamos pasar á fase 1 da desescalada porque a zona de Vigo creo que reúne todas as condicións e confío en que o Goberno de España nos autorice como conxunto de provincia”. Neste caso, as restricións poderían verse modificadas.

Benestar social

O goberno municipal vén de aprobar 26 axudas de emerxencia cun importe de 7.600 euros, o que supón un reparto diario de entre 5.000 e 10.000 euros, e no referente á entrega de comidas a domicilio, hoxe serán 609. Amais, hai 147 persoas aloxadas nos albergues e pavillóns e vanse engadindo permanentemente demandas de bolsas de comedor para familias que o precisan, mantense a atención a maiores e a entrega de tarxetas da solidariedade cada día.

O rexedor sinalou que “non estamos deixando a ninguén sen atender. O principio de política social que estamos aplicando é que en Vigo non hai límite orzamentario para a axuda social e vou mantelo todo o ano”.

Amais, o Concello continúa coa campaña de entrega de ordenadores na que suma 670 solicitudes de equipos por parte dos centros escolares da cidade para quen o Concello xa dispón de 285 ordenadores doados. Caballero valorou o “éxito” da campaña e chamou á solidariedade cidadá para que sigan chamando ao teléfono 010 para doar os equipos que teñan en desuso.

Lembrou a colaboración da empresa Revertia, que repara e acondiciona os equipos que o goberno local entrega aos centros; a colaboración de Vodafone que cedeu 50 liñas de conexión a Internet para o alumnado e a de EDNON e Imatia Innovation SL, que doaron 50 ordenadores.

Controis da Policía Local

En canto aos controis realizados onte mércores pola Policía Local para garantir o cumprimento do estado de alarma, denunciáronse 36 persoas con intervencións nunha cafetería que estaba aberta, a actuación con tres persoas sen fogar reunidas na vía pública, unha persoa lavando o coche nun lavadoiro na rúa ou outra molestando á pasaxe dun autobús urbano.