O alcalde consultará co seu comité asesor as medidas para reabrir praias e peonalizar rúas
Cuadriculas nas praias de Vigo para abrir ao público este verán. Esta medida será consultada polo alcalde co seu comité asesor de desescalada para acada a seguridade necesaria nos areais da cidade. Abel Caballero tamén avanzou que estuda peonalizar rúas e facilitar así a saída dos cidadáns.
O alcalde de Vigo, Abel Caballero, adiantou este martes que unha das medidas que xa estuda o Concello para reabrir as praias en verán é marcar cuadrículas na área de forma que estea limitado o número de persoas que poidan acceder.
Segundo explicou o rexedor en rolda de prensa, esta será unha das medidas que traslade mañá ao seu comité asesor técnico, xa que tamén baralla a apertura de rúas aos peóns para facilitar a saída da xente das súas casas neste período de desescalada.
“Escoitaba onte ao presidente de Andalucía falar de que considera cuadricular as praias e isto é o mesmo que xa transmitín eu hai 10 días ao vicepresidente da FEMP e aos alcaldes, é o que eu pretendo facer en Vigo coas praias”, sinalou.
Reunión do comité asesor
En calquera caso, Caballero pediu que “ninguén anticipe catástrofes, xa veremos, pode haber turismo interior en verano e Vigo aspira a iso”. Tamén antepuxo como condición indispensable a “seguridade total” nas medidas de reapertura. “Temos que ter garantías, cafeterías e restaurantes preparados, en isto é no que quero que axude o comité asesor de desescalada, visualizar todos estes factores”, engadiu.
Denuncias e axudas sociais
O rexedor informou de que onte luns 32 persoas foron sancionadas polo incumprimento do decreto do estado de alarma por estar paseando coas súas mascotas en parques, levar os cans soltos ou estar conversando na rúa, accións que cualificou como “illadas”. Con todo, apelou á colaboración da poboación viguesa para que “fagamos que Vigo sexa unha cidade tamén segura en termos de coronavirus” xa que o é en termos de seguridade cidadá.
No tocante ás axudas municipais, Abel Caballero deu conta da concesión de 47 novas axudas de emerxencia por un importe de 18.000 euros, co que “superamos de longo os 500.000 euros de axudas de emerxencia, case o equivalente a un ano de actuación”. Este martes o Concello reparte 627 menús a domicilio, quedan 2 prazas libres no pavillón do Berbés, onde dixo que hai algunhas persoas que marchan e xa non poden volver entrar, e deu conta tamén da ocupación de 149 prazas en pensións, hostais, albergues e no Pavillón do Berbés.
Ademais, o alcalde avanzou que xa busca outras fórmulas para reactivar a economía da cidade. “Temos que reinventarnos, fumos capaces de repoñer o concepto de Nadal desde Vigo, quero falar de todo este panorama e o faremos mañá”, apuntou.