O goberno de Vigo estende ás froiterías a recollida de residuos de reciclaxe porta a porta

O modelo xa opera con éxito na recollida do vidro no Casco Vello da cidade e agora o Concello amplíao á 180 froiterías da cidade, segundo anunciou este luns Abel Caballero. Cando acumulen unha cantidade significativa de residuo para reciclar, os comerciantes poderán chamar ao Concello para a súa recollida no establecemento.

luns, 16 dec 2019
O Concello ultima o inicio da recollida porta a porta de residuos de reciclaxe en 180 froiterías da cidade. Abel Caballero avanzou este luns que o goberno vigués remitirá sendas cartas aos establecementos para solicitar a súa colaboración nun modelo xa testado con éxito no Casco Vello e a recollida de vidro.

Cando as froiterías acumulen unha cantidade significativa de residuo para reciclar (cartón, plástico, caixas de madeira e porexpan), os comerciantes poderán chamar por teléfono ao Concello nos números habilitados ao efecto para que estes sexan recollidos. Explicou Caballero que o obxectivo é dar facilidades para a reciclaxe no comercio e evitar así que empreguen os contedores habilitados ao efecto, que en ocasións enchen polo elevado volume de residuos que xera este sector e os inutilizan na práctica.

"Desta experiencia aprenderemos para facelo noutros ámbitos comerciais", asegurou o alcalde, de cara a perfeccionar o seu funcionamento e levar a recollida de reciclaxe porta a porta a outros sectores profesionais.

Esclerose Múltiple
En rolda de prensa, Caballero trasladou que a cidade se sumará o mércores á conmemoración do Día Nacional da Esclerose Múltiple iluminando de cor vermella as fontes da rúa Aragón. O 18 de decembro se celebra esta efeméride e o goberno de Vigo coopera así coa Federación Galega.