Escoitar

Vigo aproba o proxecto para construír unha zona de ocio sobre o falso túnel da AP9 en Candeán

O alcalde de Vigo, Abel Caballero, avanzou este xoves que a Xunta de Goberno Local aprobou o proxecto para que a zona superior do túnel da autoestrada AP9, ao seu paso por Candeán, poida converterse nunha zona de ocio. Tamén foron aprobadas as becas de inglés para a Escola de Idiomas e as novas butacas para a grada de Río Baixo.

xoves, 7 feb 2019
1549548417navia.jpg
O Concello de Vigo aprobou este xoves na Xunta de Goberno Local o expediente de contratación das obras do proxecto de recuperación da zona verde situada sobre o falso túnel da AP-9 na parroquia de Candeán.

"Candeán necesita un lugar con encanto e sendo eu deputado xa visitei a zona porque había unha pendente do 80%, levei a solicitude a Madrid para que construísen o túnel e agora vamos a crear no lugar un parque de ocio", sinalou o alcalde en rolda de prensa.

O proxecto ten un orzamento base de licitación de 700.000 euros e a actuación vaise a levar a cabo unha superficie de 19.476 metros cadrados, moi próximo á praza da igrexa parroquial. A iniciativa do Concello transforma o lugar nunha gran zona verde, adecuando tres plataformas multiusos para aparcamento, actividades festivas e pradeira con terra vexetal e árbores.

Ademais, o alcalde tamén apuntou que o proxecto inclúe a instalación de alumeado público, muros de contención de terras para ampliación de anchos de vía, execución de cunetas de formigón e ampliación de las acometidas de saneamento y abastecemento.

Becas de inglés
A Xunta de Goberno Local tamén deu o visto e prace á adxudicación das becas "Concello de Vigo" de estancias lingüísticas no estranxeiro para alumnado da Escola Oficial de Idiomas de Vigo correspondentes a 2019. O importe é de 175.000 euros e inclúe 96 becas para inglés (52), francés (10), alemán (2), italiano (14), portugués (8), xaponés (7) e chino (3).

Por outra banda, foi aprobada a tramitación do proxecto de mellora da rede de abastecemento na Avenida Ramón Nieto, marxe impar, desde o número 245 ata a rúa Subride cun importe total de 299.000 euros.

Balaídos
Por último, o alcalde informou de que tamén saíu adiante en Xunta de Goberno o expediente de contratación do subministro e instalación de asentos para a grada de Río Baixo no Estadio Municipal de Balaídos. O importe é de 500.000 euros e os fondos proceden da Deputación de Pontevedra.
Descargar todas as imaxes