Caballero avala a función social dos 50.000 euros que inviste o Concello en campamentos de verán

O alcalde de Vigo, Abel Caballero, explicou hoxe mércores que este verán 2.600 rapaces de Vigo pasaron parte do seu verán nunha das actividades de ocio e formación que organizou o Concello. Ademais das 1.870 prazas nos campamentos -200 máis que o ano pasado- , puxéronse en marcha iniciativas en ludotecas, ou programas como Vigosónico ou Súbete ao Castro. O investimento, de case 50.000 euros, dixo, ten unha dobre vertente: a aprendizaxe dos participantes e darlles un respiro aos pais. "É unha cantidade moi ben investida desde o punto de vista social", indicou ao tempo que avanzou que de cara ao ano que ven "teremos que pensar en ampliar estas prazas porque hai moita demanda e moitas familias se quedan sen praza".

Caballero, que esta mañá -acompañado da concelleira de Xuventude, Chus Lago- visitou o campamento urbano de Samil, indicou que estas iniciativas, nas que se ampliou a idade dos participantes ata os 12 ou 14 anos, vanse repartindo por toda a xeografía viguesa", xa que se organizan, entre outros barrios, en Beiramar, Bouzas, Samil ou Castrelos.