Comenzaron hoxe os 10 días de loito oficial decretado polo Concello en solidariedade coas persoas que perderon a vida durante esta crise sanitaria. Na sesión plenaria desta mañá, ás 12,00 h, os corporativos gardaron un minuto de silencio en memoria das vítimas da pandemia.
O Pleno do Concello de Vigo aprobou este mércores na súa sesión ordinaria de maio unha modificación orzamentaria para dotar ao departamento de Benestar Social unha nova partida de 870.000 euros. O goberno local destacou que no primeiro trimestre do ano xa se comprometeron máis de 130 millóns do orzamento.
En sesión ordinaria, o Pleno aprobou mocións instando ao goberno autonómico a transferir ao Concello 2,7 millóns de gasto social municipal polo coronavirus, a crear no prazo dun mes un fondo de acción local para urbes e deputacións por 300 millóns e a elaborar un Plan de reactivación económica.
A maioría do Pleno deu luz verde esta mañá a unha moción do grupo socialista na que se lle pide á Xunta que deixe de poñer atrancos á obra pública de Vigo. Segundo defende o texto, despois desta crise sanitaria é máis importante que nunca reactivar a economía con inversión pública para manter e crear emprego.