Máis de 600.000 persoas fixeron de Castrelos 2026 o verán con máis actividade da súa historia
O Auditorio de Castrelos pechou este domingo unha programación de verán histórica, con 19 xornadas de apertura e máis de 600.000 asistentes entre grandes concertos, espectáculos líricos e infantís e as retransmisións dos partidos da selección española no Mundial. A programación rematou cunha fin de semana inédita de tres días consecutivos de música durante a ponte de San Roque. Abel Caballero destacou o éxito dun modelo baseado na calidade da programación e no acceso gratuíto ou a prezos reducidos, e avanzou que o Concello xa traballa no Vigo en Festas de 2027.
“Este ano tivemos 19 datas de apertura do auditorio e seguramente batemos as cifras que nunca houbera en Castrelos: máis de 600.000 persoas asistiron aos concertos e aos actos”, salientou o alcalde. A programación reuniu oito grandes citas musicais con Deep Purple, Molotov, Chayanne, Abraham Mateo, The Corrs, Viva Suecia, Iván Ferreiro e o FNAC Live Vigo, que pechou o verán coa participación de The Rapants, Fillas de Cassandra, Eladio y los Seres Queridos e Bea Fernandes DJ, convertíndose nunha gran celebración da música galega coa presenza dalgúns dos grupos de referencia da escena actual.
O cartel combinou referentes internacionais do rock e do pop con algúns dos nomes máis destacados da escena musical española e galega. Entre os grandes fitos do verán, Chayanne estableceu un novo récord histórico de afluencia en Castrelos, superando as marcas anteriores do auditorio. “Chayanne pulverizounos a todos”, afirmou Caballero, quen destacou tamén a resposta multitudinaria nos concertos de Abraham Mateo, Viva Suecia, Deep Purple, The Corrs ou Iván Ferreiro.
A música lírica volveu ocupar un lugar destacado con catro grandes espectáculos: o tradicional concerto da Coral Casablanca, a ópera Carmen, as Noites de Zarzuela e a ópera Nabucco. A programación completouse con tres propostas para o público infantil: La gran aventura del Pollo Pepe, El traje del emperador e El Payaso Tallarín.
O auditorio converteuse ademais durante o mes de xullo nun punto de encontro para seguir os partidos da selección española no Mundial de fútbol. Miles de persoas reuníronse diante da pantalla xigante instalada polo Concello para acompañar á selección española nas eliminatorias ante Portugal, Bélxica e Francia e na gran final fronte a Arxentina, na que España se proclamou, por segunda vez na historia, campioa do mundo. “Foron catro eliminatorias nas que Vigo mostrou todo o seu apoio á selección”, destacou o rexedor.
Caballero puxo tamén en valor o amplo dispositivo humano e técnico que permitiu desenvolver as 19 xornadas con garantías de seguridade. Ademais do persoal responsable da montaxe e da produción técnica, Castrelos contou con ambulancias, médicos e persoal sanitario, Policía Local e o seu equipo de drons, Bombeiros, Protección Civil, voluntariado, vixiantes de seguridade, Punto Lila e un Posto de Mando Avanzado.
O alcalde explicou que o Concello recibiu diferentes mensaxes de agradecemento de persoas que necesitaron asistencia durante os eventos e que destacaron a rapidez e o trato recibido. “Hai unha inmensa cantidade de persoas detrás de Castrelos que non se ve e que está alí atendendo e garantindo que todo funcione”, sinalou.
Tamén quixo o rexedor reivindicar novamente o “modelo Castrelos”, facilitando a chegada á cidade de grandes artistas e espectáculos ao alcance de toda a cidadanía, cun acceso gratuíto para a inmensa maioría do público e reservas de baixo custo para a platea en determinados concertos. Caballero puxo como exemplo o concerto de Chayanne, cuxas reservas de platea en Vigo custaron 15 euros, mentres que noutras cidades españolas as entradas para a súa xira alcanzaban prezos moi superiores. “Castrelos é gratis e a calidade é excepcional”, resumiu o alcalde, quen defendeu este sistema como unha forma de garantir que as posibilidades económicas non determinen o acceso aos grandes espectáculos musicales.
Coa programación de 2026 xa rematada, o Concello comezou a preparar a próxima edición. Caballero animou á cidadanía a enviar propostas e peticións sobre artistas desexados polo público vigués, sinalando que “o ano que vén vai ser aínda un Castrelos mellor que o deste ano, que foi o mellor Castrelos da historia”.
