O Concello e Mayeusis ofrecen 35 espectáculos no ciclo “Conexións”
A cuarta temporada deste programa de arte na rúa evoluciona a un formato escénico multidisciplinar incorporando a danza e o teatro á música. Desenvólvese desde este martes ata finais de setembro.
Abel Caballero participou esta mañá na presentación da cuarta temporada do Ciclo Conexións de Mayeusis que desde hoxe e ata finais de setembro ofrecerá 35 espectáculos en diferentes formatos. Participaron tamén Carmela Silva, primeira tenente de Alcadía; Gorka Gómez, edil de Cultura; Lucas Alonso, director de Mayeusis; e Marga Macías, xefa de administración de Mayeusis .
Para o alcalde o ciclo “Conexións” é un “evento imprescindible na cidade. Ao ir paseando atopas os músicos en calquera ámbito; é unha forma de enraizar a música en Vigo”, sinalou ao explicar que os 35 espectáculos do programa deste ano poderán gozarse en diferentes formatos: cámara (2 a 5 artistas), grupo (6 a 12 artistas) e gran formato (de 12 a 50 artistas).
Destacou o rexedor a “presenza nos barrios” da cidade dun programa de arte na rúa que ademais de música incorpora danza e teatro e que se desenvolverá en 25 espazos diferentes: prazas, rúas, espazos históricos para poñer en valor o patrimonio, igrexas románicas, barrios… en horario de mañá e de tarde.
Conexións celebrará cinco tipos de programas artísticos: clásico, folk – tradicional, jazz e música moderna, danza e artes escénicas e espectáculos Conexións para chegar a diferentes públicos desde diferentes lugares e en diferentes tempos.
Os espectáculos que non poidan desenvolverse na rúa por condicións meteorolóxicas adversas trasladaranse ao Auditorio de Mayeusis.
