O alcalde avoga por dar a Conxemar o espazo “que necesite”
O alcalde de Vigo defendeu este martes ante o presidente da Xunta e responsables de Conxemar, co gallo do inicio da XXIV edición da cita internacional do sector dos produtos do mar conxelados, a transcendencia de proporcionar á organización da feira os medios que precisen para seguir crecendo e manterse como referente mundial do sector pesqueiro.
Abel Caballero destacou o “espírito de cooperación” que se expresa en Conxemar, tanto pola participación e reunión na feira de Vigo de empresas de preto de 50 países, como polo apoio conxunto das administracións a unha iniciativa con repercusión internacional. Definiu a feira como a ONU pola súa capacidade de xerar sinerxías conxuntas.
Ante a dimensión e repercusión da XXIV edición de Conxemar, o rexedor recoñeceu a “necesidade” de crecemento, como reclama a organización. Así, argumentou que “necesitamos proporcionarlle todo o espazo que se demande para que sexa capaz de facer esta gran reunión, que vai máis aló da economía e a relación. Queremos que Conxemar continúe na súa senda natural de crecemento”, incidiu. Acto seguido o alcalde insistiu en que Vigo espera “ansiosa” unha delegación da FAO na cidade.
O rexedor engadiu ás súas demandas que a regulación da capacidade pesqueira se produza “a través da ciencia, porque non nos gusta a normativa de augas profundas da Unión Europea porque sabemos que non responde a criterios científicos. Defenderemos as nosas razóns porque cremos que son boas”.
Caballero tamén reclamou que os Fondos de Reestructuración Pesqueira “flúan” cara ao sector da pesca.
O alcalde trasladou o “compromiso colectivo co mar e co medio ambiente, porque é a vida deste planeta e das empresas que faenan en todos os mares e océanos”.
Ante empresarios de todos os continentes, o rexedor recalcou que a feira “se tingue do respecto ao medio ambiente” e da actividade económica que xera o mar, para proclamar que “respectamos o mar” e “somos axentes activos da defensa do mar: desde as empresas, a ciencia e os institutos de investigación tan presentes en Vigo, para seguir preservando o mar”.
O alcalde describiu a Conxemar como o escenario en que se suman as voces de quen defende o medio mariño e “clamar polo seu defensa, para que os mares e océanos se manteñan como as fontes de vida e alimentación deste planeta”. O respecto das normas pesqueiras é para Caballero unha mensaxe transcendente tamén lanzada desde a feira de Vigo.
O rexedor destacou a achega das empresas do sector pesqueiro á “alimentación saudable e á dieta atlántica de Vigo” e apuntou a importancia das "cadeas de valor engadido, e da sustentabilidade, que teñen que ir xuntas”.
Crítico cos “ataques inxustos por razóns ideolóxicas” á actividade do mar, Caballero expresou o seu defensa á actividade extractiva do mar “que se fai coas boas formas, coa capacidade de obedecer á ciencia e sabendo que ao final está paliar a fame e dar boa alimentación”.
Caballero avanzou a presentación dun estudo sobre as empresas mixtas realizada conxuntamente coa Cooperativa de Armadores de Vigo e o Consorcio de Zona Franca.
Tras percorrer as novidades da nova edición, o alcalde cualificou de “heroes” aos responsables da cita organizada no Instituto Feiral de Vigo “por facer que se converteu nunha referencia mundial do bo facer da actividade marítima e transformadora”.
