Roberto Cavallo, director de Denso, autor do Bando da Reconquista 2023
O alcalde informou que Paco Amoedo e a Vig-Bai serán galardoados o vindeiro xoves 23 de marzo como Vigueses Distinguidos na gala que se celebra no Teatro Afundación.
O autor do Bando da Reconquista deste ano 2023 será Roberto Cavallo, director xeral de Denso Sistemas Térmicos, “unha gran factoría do mundo da automoción” e presidente de CEAGA, o Cluster da automoción, amais dun participante “activo” en moitas cuestións da cidade, tal e como explicou Abel Caballero ao dar conta da súa elección.
Ademais, o rexedor informou da concesión do galardón de Vigués Distinguido a Paco Amoedo, “figura imprescindible na análise da historia do deporte da cidade de Vigo como impulsor do boxeo”. Unha persoa que sempre “participou contribuíndo co seu coñecemento deportivo” en diferentes ámbitos e disciplinas. Nacido en Vigo en 1943, entrou no mundo do boxeo con 15 anos e, dende a súa retirada, dedicouse á preparación de novas xeracións manténdose sempre vinculado a este deporte. No ano 2022 recibiu o Premio Luís Miró na Gala do Deporte do Concello pola súa traxectoria.
A Vig-Bay será Viguesa Distinguida 2023, o media maratón que se disputa entre Vigo e Baiona, que este ano celebra a súa 22 edición, será recoñecida tamén pola cidade no acto que se celebra o vindeiro xoves, 23 de marzo, ás 20 horas no Teatro Afundación.
O rexedor lembrou os premiados 2023: Medalla de Ouro da cidade a título póstumo: Ceferino de Blas e Medalla de Ouro da cidade deste ano a Estaleiros Armón Vigo. As Viguesas e Vigueses Distinguidos son: África González, Catedrática de Inmunoloxía na Uvigo; Martín da Puente, tenista en cadeira de rodas; María Castro, actriz e presentadora de televisión; Miguel Méndez, adestrador, seleccionador baloncesto feminino; Mariana Carballal, actriz; Ana Ulla, científica viguesa; Antón Vidal Andión, vicevaledor do Cidadán de Vigo desde 2002; os centros educativos vigueses que cumpren 50 ou máis anos: CEIP Mestres Goldar, Castrelos e o CEIP Ramón y Cajal (Picacho) e o Colexio plurilingüe Nosa Señora da Esperanza; e aos clubs que cumpren cen anos neste 2023: Racing de Castrelos Club de Fútbol e Valladares Club de Fútbol.