O goberno municipal adica 514.000 á produción técnica dos concertos de Castrelos
O goberno de Vigo adxudicou este contrato, ao que destinará máis de medio millón de euros para dispor a parte técnica que faga posible a ducia de actuacións musicais programadas para este verán no auditorio vigués, entre eles, Sting, “o concerto máis importante que vai haber este verán en toda Galicia”, afirmou Caballero.
Segundo explicou o alcalde, a sesión extraordinaria da Xunta de Goberno Local celebrada este martes resolveu adxudicar a produción técnica dos espectáculos do Vigo en Festas no auditorio ao aire libre de Castrelos. O Concello reserva ao efecto 514.000 euros.
O contrato quedara deserto na anterior licitación e o goberno de Vigo acordou volver a sacalo polo procedemento de urxencia, para acurtar os prazos. Os servizos técnicos contratados permitirán realizar os concertos que o Concello de Vigo ten pechados para Castrelos este mesmo verán.
Entre os artistas confirmados está Sting. O músico e cantante, líder da mítica banda The Police, chega a Vigo este verán logo de dous aprazamentos consecutivos por mor da Covid e ofrecerá na cidade “o concerto máis importante que vai haber este verán en toda Galicia, de largo, e ademais gratuíto”, en verbas de Abel Caballero.
O primeiro en subirse ao emblemático escenario vigués será Joan Manuel Serrat, o 10 de xullo. Despois actuará Sebastián Yatra o día 13, Love of Lesbian o 29 e Tanxugueiras o 30 de xullo. En agosto visitarán Castrelos Leiva o día 4, Sting o día 6, Lola Índigo o 8, Woyza e Hijos de la ruína o día 11, Hombres G o 14, Raphael o 16 e Dani Martín o 17 de agosto. A Coral Casablanca tamén actuará este verán, con data pendente de anunciar.
O alcalde recordou que o Concello, ademais de contratar directamente estes espectáculos en Castrelos, copatrocina o concerto do canadense Bryan Adams no campo de fútbol das Travesas -cun aporte económico e a cesión gratuíta do espazo- e tamén o de Muse en Balaídos, onde o Concello cede de balde o estadio municipal para a súa realización.