Caballero reclama para o Instituto Español de Oceanografía a sede central de coordinación
Di estar en contacto permanente co ministerio de Ciencia e Innovación e apunta a criterios obxectivos para que Vigo sexa a sede de coordinación de todos os institutos oceanográficos de España.
O alcalde reclama que o Instituto Español de Oceanografía de Vigo sexa a sede central de coordinación dos institutos de España. O Goberno de España está a descentralizar esta institución e Caballero sinala o recoñecido papel do IEO para a cidade co nomeamento de “Vigués Distinguido” no 2007 e a Medalla da Cidade en 2017 co motivo do seu centenario.
O rexedor di estar en contacto permanente co ministerio de Ciencia desde que comezou o proceso de descentralización do organismo e reclama con criterios obxectivos que Vigo sexa a sede central: “A cidade de Vigo é un referente mundial en investigación mariña, acollendo proxectos científico-tecnolóxico relevantes que teñen ademais repercusións económicas de primeiro nivel. Vigo xa é hoxe a cidade europea con maior concentración de institucións e unidades de investigación públicas e privadas do sector, hasta sumar un total de cerca de 1000 investigadores.”
Caballero fixo fincapé na importancia da oceanografía “coa propia Universidade de Vigo, coas facultades de Ciencias do Mar, Bioloxía, e Química e a Estación de Ciencias Mariñas de Toralla, o Instituto de Investigacións Mariñas, que forma parte do CSIC, ANFACO (Asociación Nacional de Fabricantes de Conservas, acreditado como centro tecnolóxico), o Instituto Marítimo-Pesqueiro do Atlántico, así como a Axencia Europea de Control da Pesca. Este conxunto de institucións académicas, de investigación e innovación conforman un ecosistema de investigación e innovación único en España e en Europa.”
Deste xeito, Caballero explicou que “non só reclama un área, se non a sede central como o ecosistema de investigación e innovación marítimo-pesqueira máis axeitado para coordinar as actividades do IEO”.