O goberno de Vigo súmase á manifestación polo Día internacional das Mulleres
Este sábado comezaron as actividades organizadas na cidade para conmemorar o 8 de Marzo, que continúan hoxe luns cun recital aberto de poesía de xénero, ás 19 horas na Casa Galega da Cultura, segundo recordou o alcalde. Este martes, a mobilización parte da Praza da España ás 19:30 horas.
A do martes é unha xornada “moi importante”, en verbas de Caballero, “o día da igualdade”, no que o goberno de Vigo vai “apoiar” a reivindicación e celebrar a ducia de actividades programadas polo Concello e o Consello municipal da Muller, baixo o lema “Feminismo. Revolucionando o mundo”.
Vigo ofrece propostas de todo tipo e para públicos de todas idades, desde cine e concertos ata contacontos, teatro, roteiros ou poesía. Comezaron este pasado sábado coa proxección da curta “Anatomía dunha serea” no auditorio municipal do Concello, e continúan este luns cun recital aberto de poesía de xénero, que dará comezo ás 19 horas na Casa Galega da Cultura. Caballero trasladou que o evento será conducido por Silvia Penas e os cidadáns que o desexen poderán participar na lectura dos textos que desexen.
O martes é o día central da conmemoración, un 8 de Marzo que comezará ás 10 horas co habitual sesión plenaria do Consello municipal da Muller, no Concello de Vigo, e proseguirá cunha manifestación convocada por Galegas 8M, que partirá desde a Praza de España ás 19:30 horas. Abel Caballero asegurou que, “como é natural, nos sumamos como goberno, e eu como alcalde, á convocatoria de Galegas 8M”. Ademais, este martes os autobuses urbanos da cidade sairán ás rúas coa mensaxe “8 de Marzo. Día da Muller” nas súas pantallas.
A programación prolóngase durante esta semana. O mércores, representación da obra de teatro “Tabú” no auditorio municipal do Concello; o xoves, proxección de “La ola verde” no auditorio municipal de Teis; o venres, contacontos de igualdade na Praza 8 de marzo; e o sábado, visita guiada ao roteiro feminino “Sons de Mulleres”, desde o Paseo de Alfonso.
Para a semana seguinte queda o acto de entrega do X Premio de Igualdade Ernestina Otero, que se celebrará o 15 de marzo no auditorio municipal do Concello, a representación teatral “As alumnas” no mesmo espazo o 16 de marzo, e o filme “Sonita” no auditorio de Teis o día 17. Conclúen os actos o 22 de marzo coa actuación musical do grupo Fillas de Cassandra, no salón de actos do MARCO.