Abel Caballero anuncia o regreso en maio do festival TerraCeo no Mar de Vigo
O evento musical adiántase este ano á primavera e volverá a traer á cidade espectáculos da escena local, nacional e internacional nun formato moi similar ao do ano pasado, con servizo de barra e protocolo anti-Covid na terraza do Auditorio de Beiramar. Os artistas serán confirmados en próximos días.
“Iniciamos en Vigo o festival TerraCeo o día 1 de maio”. O alcalde anunciou este xoves o seu regreso ao Mar de Vigo a partir do 1 de maio, con máis de trinta concertos e artistas galegos, españois e internacionais, todos eles pendentes de confirmar en próximas datas.
A primeira edición desta cita na terraza do auditorio de Beiramar tivo lugar no verán do 2020, de xullo a setembro, e cun “éxito importantísimo” ao congregar a 14.000 persoas. Neste 2021, o formato será similar ao do pasado ano: concerto durante a posta do sol, servizo de barra e medidas de seguridade contra o Covid, tal e como explicou Abel Caballero: “Estamos á cabeza do desenvolvemento dos festivais con seguridade Covid 1000% de música de España”.