O xornalista Ceferino de Blas será o novo cronista oficial da cidade
O alcalde nomeará ao xornalista Ceferino de Blas como novo cronista oficial da cidade, en substitución do falecido Lalo Vázquez Gil. A traxectoria deste profesional, que traballou en varios medios de comunicación, está moi vinculada a Vigo, na actualidade, a través do Instituto de Estudios Vigueses.
O rexedor asinará a semana que vén o decreto de nomeamento de Ceferino de Blas como novo cronista oficial da cidade. Xornalista, estudou na Universidade Pontificia e traballou en diferentes medios de comunicación, entre eles, o Faro de Vigo, do que foi director entre 1986 e 1994. Rematada esa etapa, seguiu impartindo cursos de xornalismo e a súa traxectoria intelectual segue moi vinculada á cidade, neste momento, a través do Instituto de Estudios Vigueses. En rolda de prensa, o rexedor lembrou algúns dos seus antecesores no cargo: Lalo Vázquez Gil, Xosé María Álvarez Blazquez, José Espinosa Rodríguez, Avelino Rodríguez Elías e Nicolás Taboada Leal, que foi o primeiro en ostentar este cargo.