Escoitar

Santi Domínguez anuncia a adquisición dun pazo e outros dos inmobles no Casco Vello para a pinacoteca municipal

O tenente de alcalde, Santi Domínguez, anunciou hoxe que acaban de adquirirse tres inmobles na rúa Abeleira Menéndez, un deles o pazo de Arias Taboada, para a ubicación da pinacoteca municipal, que será un novo centro expositivo do Museo da Cidade. O concelleiro asegurou que esté é o punto de partida para cumprir o compromiso de ter un lugar axeitado para expoñer os fondos pictóricos de Castrelos, que agora non se poden amosar por falta de espazo.

xoves, 16 xul 2009
1247748218roldapinacoteca.jpg
Santi Domínguez lembrou que a pinacoteca é unha vella reivindicación da cidade á que, por fin, desde a Tenencia de Alcaldía e a Concellería de Patrimonio Histórico estamos a dar resposta. Segundo explicou, agora vai ser posible que "esta cidade poña en valor toda a súa obra pictórica".

Os edificios adquiridos son os números 8, 10 e 12 de Abeleira Menéndez. O primeiro deles é un pazo construído no século XVII. "Quixemos que o edificio que albergara a pinacoteca fora un inmoble singular e este pazo o é", indicou o tenente de alcalde.

Santi Domínguez explicou que o seu primeiro propietario foi Diego Árias Taboada, mestre de campo e gobernador da praza no século XVII. Árias Taboada foi o encargado de organizar a defensa para rexeitar ao invasor portugués na guerra do século XVII. Tamén foi obra súa un plan de fortificación e unión das fortalezas de O Castro e San Sebastián.

Do pazo salienta o carácter barroco dos seus valados, cornixa e ménsulas en chanzos sobre as que descansan pequenos balcóns. Santi Domínguez sinalou que ten un escudo de armas de Taboada e Figueroa no centro da fachada.

O tenente de alcalde explicou que o obxectivo prioritario desta actuación é dispor dun espazo axeitado para os fondos do Museo da Cidade, pero tamén "quixemos que este proxecto permitira contribuir á rexeneración ambiental é urbanística da parte alta do Casco Vello, coa que estamos absolutamente comprometidos". Asegurou que a pinacoteca será unha dotación cultural singular e como tal vai ser un elemento de dinamización fundamental para o barrio.

A pinacoteca terá unha superficie edificable de 1.330 metros cadrados e unha superficie expositiva de 1.400 metros cadrados. A actuación prevista para a pinacoteca completarase cun centro de tratamento, para traballar na recuperación e documentación de toda a obra pictórica. Este centro ubicarse nun edificio situado tamén no Casco Vello, neste caso na rúa Chao, que recentemente ten adquirido o Concello ao Consorcio do Casco Vello.

O tenente de alcalde explicou que a compra dos tres edificios de Abeleira Menéndez supuxo un investimento de 1.850.000 euros. E o orzamento de Eduardo Chao, que terá outros usos ademais do centro de tratamento, foi de 885.000 euros.

Santi Domínguez adiantou que xa se está a traballar na elaboración do proxecto expositivo, que se presentará no mes de setembro. A previsión é ter antes de final de ano rematados todos os trámites administrativos e o proxecto de rehabilitación e iniciar as obras no primeiro trimestre do vindeiro ano.
Descargar todas as imaxes