O Concello amplía as becas de inglés ata os 1.015 alumnos
O alcalde pon en valor o “éxito excepcional” do programa Vigo en Inglés que suma 88 prazas máis nesta convocatoria para alumnado de 4º da ESO. Así, serán 1.015 as mozas e mozos que aprenderán o idioma no Reino Unido ou Irlanda este ano.
A Xunta de Goberno Local acaba de aprobar a ampliación do número de bolsas do programa “Vigo en Inglés” para este curso. Serán 88 prazas máis e supoñerán un incremento de 285.000 euros no orzamento.
Tal e como explicou Caballero, o Concello prevía inicialmente a concesión de 927 bolsas e coa ampliación acadará as 1.015 de maneira que o presuposto do programa acada os 3.285.000 euros. O custo de cada praza é de 3.235 euros, que financiada na súa totalidade o Concello. Nos vindeiros días será publicada a resolución da convocatoria deste ano.
Vigo en Inglés é o programa de inmersión lingüística municipal, posto en marcha no ano 2008 cun “éxito excepcional” e co que mozas e mozos de 14 e 15 anos pasan tres semanas convivindo cunha familia inglesa e “coñecendo a cultura británica e irlandesa”, unha experiencia que da como resultado que “Vigo é a cidade de España que mellor fala inglés e queremos seguir nesa liña”, apunta o alcalde.
Grazas a este programa municipal, explica Caballero, que máis de 12.000 estudantes vigueses gozaron xa da súa bolsa. “Cando cheguei á Alcaldía soamente ían estudar inglés os fillos dos donos das fábricas, agora van todos os que cumpren os requisitos, practicamente a metade de cada promoción”.
Sala Ártika
A Xunta de Goberno aprobou tamén a subvención nominativa de 10.000 euros á Sala Ártika para financiar a programación realizada en xaneiro de 2026. Trátase dun espazo dedicado ás artes escénicas, que naceu co obxectivo de achegar o teatro á cidadanía viguesa e reinvindicar as artes escénicas como opción de lecer e a creación de novos públicos. Na súa programación inclúen espectáculos de diferentes disciplinas: danza, monicreques, comedia musical e dramas, da man de compañías de Galicia e Extremadura, de ampla traxectoria, outras de recente creación e con espectáculos de gran formato.