Os maiores de Vigo melloran as súas competencias dixitais cos teléfonos móbiles
O alcalde participou na entrega de diplomas dos cursos de capacitación dixital e uso do teléfono móbil para persoas maiores de 65 anos. “Seguiremos facendo estes cursos”, avanzou.
Abel Caballero achegouse ao acto de entrega dos diplomas de capacitación dixital a 40 persoas maiores de 65 anos que completaron con éxito un curso de 70 horas centrado no uso do teléfono móbil.
Segundo explicou o rexedor, o obxectivo do programa é dotar ás persoas maiores das ferramentas necesarias para interactuar con autonomía no ámbito dixital, facilitando a súa comunicación con familiares e amizades, así como a realización de xestións administrativas, trámites telemáticos e tratamentos dixitais básicos.
Dos 40 participantes, 36 foron mulleres e 4 homes, un dato que, segundo Caballero, evidencia a existencia dunha importante fenda dixital nas mulleres maiores de 65 anos. “É unha fenda que temos que reducir”, subliñou.
O alcalde destacou a excelente acollida da iniciativa, sinalando que as persoas participantes “están moi contentas” e mesmo demandaron a posta en marcha de novos cursos. Neste sentido, avanzou que o Concello seguirá ofrecendo formación en capacitación e dixitalización de balde e para todas as persoas interesadas.