Concello e Zona Franca envían á Xunta o novo convenio para o aparcadoiro e a vía principal da ETEA
O alcalde e o delegado de Zona Franca anunciaron que remitiron este venres ao goberno autonómico o novo proxecto de convenio para desenvolver as obras de humanización da vía central da ETEA e a construción do aparcadoiro subterráneo.
Abel Caballero e David Regades anunciaron a súa disposición a asinar inmediatamente a nova proposta de convenio coa administración galega polo que Zona Franca asume o proxecto para realizar as obras de humanización do vial central da ETEA e a construción do novo aparcadoiro subterráneo, tras a cesión por parte do Concello do solar de propiedade municipal. “Desde Zona Franca e desde o Concello desatascamos este nó que leva tantos anos atado e isto é moi bo para Teis, para a ETEA, para a cidade e para Galicia porque vai ter un desenvolvemento de investigación, docencia, universidade e de convivencia extraordinariamente importante”, afirmou o alcalde.
O delegado de Zona Franca apuntou que se remitiron as últimas achegas ao convenio coa Xunta coa perspectiva de que “no menor tempo posible” a administración autonómica responda ás correccións de matiz ao convenio e subscribrilo entre as tres administracións.
David Regades lembrou que o acordo proposto contempla que Zona Franca realizará as obras tanto do aparcadoiro como da humanización e dos servizos do vial da ETEA. Zona Franca encargará o proxecto que unificará as obras de urbanización do vial e do aparcamento “para cohesionar os dous proxectos nun”.
O Concello, á súa vez, cede temporalmente o espazo de titularidade municipal, en primeiro lugar a Zona Franca, para realizar despois unha concesión de dominio público para a explotación do aparcadoiro. Regades incidiu en que para Zona Franca trátase dun tema “vital”, que leva moito tempo parado, e que “unha vez máis” o Concello e o ente estatal desbloquean un proxecto importante para Vigo, que leva moito anos á espera de desenvolvemento.
Proceso
Abel Caballero lembrou que cando chegou á alcaldía de Vigo atopouse na ETEA un portalón pechado que impedía o acceso da cidadanía ás instalacións. “Isto era unha zona hostil, afastada da cidade e propuxémonos recuperala. O primeiro que conseguimos foi abrila e que a cidade e Teis recuperasen a ETEA”, apuntou o rexedor, ao poñer en valor que a segunda actuación se centrou en recuperar a zona deportiva”. Caballero apuntou que mentres o Concello abría unha parte da ETEA á cidade, a Xunta pechou a súa área “sen facer nada”.