O alcalde celebra a aprobación da rede de moi alta tensión eléctrica para Vigo
O Goberno vén de aprobar a modificación puntual do Plan de Desenvolvemento da Rede de Transporte de Enerxía Eléctrica no horizonte 2026 que permitirá que Stellantis e a industria da cidade conten coa moi alta tensión eléctrica.
Abel Caballero valorou que se trata “dun apoio importantísimo e vital para que Stellantis continúe fabricando os seus automóbiles en Vigo” e informou do envío dunha carta á vicepresidenta do Goberno de Transición Ecolóxica, Teresa Ribera, na que lle traslada “o recoñecemento” por esa decisión que acaba de aprobar o Consello de Ministros.
A modificación puntual do Plan de Desenvolvemento da Rede de Transporte de Enerxía Eléctrica dotará á cidade da moi alta tensión eléctrica de 220KV que, en palabras do alcalde, era “o que Stellantis e a industria e Vigo reclamaban e o que a cidade quería”.
O plan do Goberno para Vigo conta cun orzamento de 72 millóns de euros e inclúe 73 actuacións en toda España cun investimento de 489 millóns de euros.