A Xunta de Goberno Local deu luz verde este venres ao orzamento municipal deste ano, 228 millóns de "profundo contido social e xeración de emprego", indicou o alcalde, quen informou da reserva de 19,1 millóns para protección social e emprego, case un 12% máis que en 2013, e 11,3 millóns de investimentos. O Concello inclúe 700.000 euros para bolsas de inglés.
O goberno local respalda a petición do sector da perruquería que reclama un IVE reducido para poder manter abertas as súas empresas e os empregos. Así o avanzou esta mañá a tenente de alcalde, Carmela Silva, quen anunciou a presentación dunha moción no Pleno do Concello para salvagardar un sector que xa perdeu 20.000 empregos desde que o Goberno Central subira a carga impositiva a este sector dun 8 a un 21%.
O alcalde de Vigo participou esta mañá de venres na presentación da Ruta do Pincho da Lamprea do Miño no Museo de Arte Contemporánea de Vigo. A ruta, organizada polos Viveiristas e Pescadores da Guarda, xunto coa colaboración do Concello da Guarda, naceu coa finalidade de promocionar a Lamprea do Miño entre o público como un pincho a un prezo alcanzable.