Caballero propón a Xunta e Deputación cofinanciar un voo a Londres desde Vigo
Caballero demandou á Xunta e á Deputación a contratación conxunta dun voo directo a Londres desde Vigo, cun reparto de custos a terzos para cada administración. Segundo explicou, estes acordos financiaríanse mediante contratos de promoción turística subvencionados polas tres entidades públicas porque desde Vigo viaxa xente de todo o sur de Galicia.
O alcalde de Vigo reclamou este luns a Xunta e Deputación que acheguen unha partida económica para que o aeroporto de Vigo implante novos voos, propoñendo un sistema de cofinanciamento entre as tres administracións (local, provincial e autonómica) para unha conexión con Londres, tras a marcha de Ryanair. Caballero afirmou que a cidade está "a recibir ofertas de compañías que queren facer voos" desde Vigo, singularmente con destino a Londres. Así mesmo, lembrou que esa conexión fíxose con Ryanair, financiada polo Concello mediante un contrato de promoción publicitaria e turística, que finalizou ao 31 de decembro de 2025.
"Pero desde Vigo non só voa xente de Vigo. Voa xente de Vigo, voa xente da área metropolitana, voa xente de todo o sur de Galicia e, por tanto, eu fágolle unha proposta á Xunta e á Deputación: contratemos un voo a Londres cunha empresa, unha compañía de -baixo custo -, e un terzo do custo págao a Xunta, un terzo do custo págao a Deputación e un terzo do custo págao o Concello", expuxo. O alcalde propuxo "repartir os custos", porque "en Santiago, o 100 por 100 págao a Xunta" con axudas ao aeroporto compostelán. "A proposta é firme e está enriba da mesa. Podemos contratar de forma inmediata un voo a Londres", insistiu, e engadiu: "O custo repartímolo entre Xunta, Deputación e Concello. Un terzo cada un. A ver se queren apoiar ao aeroporto de Vigo ou soamente ao aeroporto de Santiago".