O alcalde reitera por carta á Xunta a oferta para ampliar o Ifevi coa financiación de Zona Franca
Abel Caballero anunciou este luns o envío da segunda carta deste ano ao conselleiro Emprego, Comercio e Emigración da Xunta, José González Vázquez, reiterando a proposta exposta hai cinco meses para “iniciar sen máis demora” a ampliación do Instituto Feiral de Vigo e afrontar a demanda de espazo de citas como a de Conxemar. “Empezo a sospeitar que Rueda quere que a feira se vaia de Vigo”, indicou o alcalde ao recordar que segue pendente a valoración dos activos das administracións que permitirá a Zona Franca asumir o financiamento das obras.
O alcalde remitiu hoxe á Xunta de Galicia a segunda carta de 2025, reiterando a proposta remitida o pasado mes de maio para realizar unha taxación independente das propiedades das administracións implicadas, co obxecto de acometer a “imprescindible” ampliación de IFEVI que será integramente financiada por Zona Franca.
Caballero, tras apuntar que “resulta difícil de comprender que unha cuestión de tal importancia para Vigo permaneza paralizada” pola falta de resposta da Xunta, reitera na misiva a oferta de designar un taxador independente, acordado entre o Concello, a administración galega e Zona Franca, para que valore os efectivos de IFEVI.
O rexedor incide no compromiso de Zona Franca de asumir integramente o custo da ampliación para acometer a iniciativa que considera “imprescindible para garantir o desenvolvemento e futuro de Conxemar, de Vigo e de Galicia”. Caballero espera que a Xunta responda á segunda carta deste ano, “xa que a ausencia de contestación podería ser interpretada como unha falta de interese na ampliación” do IFEVI. “É imprescindible a valoración para que Zona Franca entre no padroado e por que non quere facer a valoración? Por que non quere que se amplíe o IFEVI?”, interrogou ao indicar que “empezo a sospeitar que quere que Conxemar se vaia de Vigo”.
Feira Conxemar
O alcalde felicitou este luns á dirección de Conxemar polo éxito alcanzado na vixésimo sexta edición da Feira dos produtos conxelados do mar, que se constata no récord de visitantes con 30.405 asistentes, que representa un incremento do 12 por cento nun ano. “Que extraordinario sería se tiveramos a ampliación feita”, recalcou.
Ante a falta de respostas ás iniciativas expostas polo Concello e Zona Franca para aumentar o espazo expositivo, Caballero acusou ao presidente da Xunta de “non querer a ampliación” á vez que destacou a presenza en Vigo do ministro de Agricultura, Pesca e Alimentación, a secretaria xeral de Pesca, Abanca e distintas autoridades. “O presidente da Xunta non estivo na feira máis importante de Galicia porque parece que non lle gusta Conxemar e non quere facer o IFEVI. Dá toda a impresión de que non lle gusta nada o IFEVI e parece non gustarlle Conxemar”.
O rexedor lembrou a Alfonso Rueda que Conxemar é “unha peza moi cobizada para marchar a Barcelona. Axudounos o Goberno de España e parámolo pero segue o desexo de que se vaia a Madrid ou a Barcelona e por iso hai que enraizala en Vigo e necesítase obrigatoriamente a ampliación de IFEVI”.