Os edificios da Universidade e o Centro Comercial Camelias serán intelixentes
O goberno local aprobou os convenios con ambas entidades para instalar sensores que aporten e reciban información en tempo real. Esta acción enmárcase dentro do Plan Nacional de Territorios Intelixentes da Axenda Dixital de España polo que Vigo recibiu 4 millóns de euros do Goberno de España.
Caballero cualificou este programa como “da maior importancia” porque permitirá intercambiar información e datos con máis de 150 edificios da cidade. A Xunta de Goberno aprobará o venres os convenios coa Universidade de Vigo e o Centro Comercial Camelias para comezar a recibir e aportar información a estes edificios directamente desde a casa consistorial.
Segundo enumerou o alcalde, na universidade os edificios dotados con este sistema serán o Reitorado, as dúas escolas de Enxeñería Industrial, a estación de Ciencias Mariñas de Toralla, o edificio de Ciencias Experimentais, o edificio da Xerencia de Servizos Centrais, a Facultade de Filoloxía e Tradución, o CACTI, a Escola de Enxeñería de Telecomunicacións e a Facultade de Ciencias Económicas e Empresariais.
O Concello destina a este proxecto 5 millóns de euros, dos cales 4 proceden do Goberno de España dentro do Plan Nacional de Territorios Intelixentes dotado cos fondos europeos FEDER. Instalaranse sensores en máis de 150 edificios da cidade. Neste momento, xa están activos no proxecto piloto o edificio da estación de tren, o aeroporto e Zona Franca como o Centro Comercial A Laxe.
Segundo explicou Caballero, estes sensores permiten facer unha análise intelixente de determinados parámetros como o consumo da auga e detección de fugas, consumo de enerxía eléctrica, control de ruídos, avaliación da calidade do aire, confort térmico, calidade luminosa, a ocupación dos edificios, a necesidade de transporte e medición de aforos, entre outras.
“Isto é unha revolución e Vigo ocupa un lugar destacado”, concluíu.