VigoCultura programa 23 espectáculos para o segundo semestre do ano
O alcalde avanzou parte da programación municipal de artes escénicas que encherá o Auditorio Municipal entre outubro e decembro. “Camino al zoo” con Fernando Tejero, Daniel Muriel e Mabel del Pozo, as propostas de Talía Teatro, das viguesas Amorodio e Troponontroppo ou os monólogos de Luis Fabra e Danny Boy-Rivera, son algunhas das citas destacadas.
Concello de VigoCultura prepara a súa programación de artes escénicas para o segundo semestre do ano no que están previstos 23 espectáculos, dos que 19 son galegos e 4 chegan de fóra de Galicia. Cun orzamento de 90.00 euros, poderán verse entre outubro e decembro no Auditorio Municipal.
A falta de novas confirmacións para completar o programa, VigoCultura ofrecerá espectáculos para tódolos públicos con monicreques, novo circo, maxia, teatro xestual e teatro contemporáneo, ademais dun espectáculo de danza para primeira infancia (nenas e nenos 0 a 3 anos).
Abel Caballero avanzou algún dos espectáculos destacados para o público familiar:
◦ “Entrecajas” de Teatro Paraíso, premio Fetén 2024 ao mellor espectáculo de clown
◦ “A teteira de Kabul”, de Jarabe Tulú”, finalista nos Premios María Casares 2024 na categoría de monicreques
◦ Joshua Kennet, artista inglés-galego, que gañou en 2023 o Premio Frakson outorgado pola Sociedade Española de Ilusionismo de Madrid ao mellor ilusionista do estado español
◦ A compañía viguesa Amarelo estrea a súa obra “O arcón de Noa”
Entre os destacados para público adulto están:
◦ Pentación, compañía creada nos anos 80 por Rafael Álvarez “El Brujo”, que trae a Vigo “Camino al zoo” con Fernando Tejero, Dani Muriel ou Mabel del Pozo
◦ “Una enemiga del pueblo” de Talía Teatro que levou sete premios María Casares 2024 e estivo nomeada aos Premios Max das Artes escénicas
◦ Compañías da cidade: Amorodio con “Cuadra de Amor” ou Troponontroppo con “A noite antes xusto dos bosques”
◦ Compañías de renome no panorama teatral galego como Sarabela Teatro, Teatro do Noroeste ou Redrum Teatro, así como compañías de danza como a de Fran Sieira ou Verdeveras en coprodución co Centro Dramático Galego
◦ Polo momento, van confirmados catro monólogos:
▪ Luís Fabra (colaborador do programa de televisión “Todo es mentira”)
▪ Danny Boy-Rivera (colaborador do programa La Resistencia)
▪ Esther Carrodeaguas con “O único que verdadeiramente quixen toda vida é ser delgada”
▪ “Yo, Fraude” da viguesa de adopción Paula Pier