Caballero participará na homenaxe ás Forzas e Corpos de Seguridade, Forzas Armadas e Protección Civil polo seu papel na xestión da COVID-19
O acto celébrase no Senado o vindeiro xoves, 13 de outubro, a partir das 12.00 horas. Mañá mércores, Abel Caballero estará na celebración dos actos do 12-O na recepción do Pazo Real.
O presidente da FEMP, Abel Caballero; o presidente do Senado, Ander Gil; e o ministro do Interior, Fernando Grande Marlaska, encabezarán no Senado o acto co que o vindeiro xoves, día 13, renderase homenaxe ás Forzas e Corpos de Seguridade, Forzas Armadas e Protección Civil polo papel desempeñado durante a pandemia. Así o anunciou esta mañá o presidente da Federación destacando o “traballo excepcional” que todos eles realizaron “nos momentos tan difíciles do COVID”. “Cada un deses corpos e forzas, operando desde o ámbito da súa competencia, demostraron coa súa actuación que somos un gran país”. Segundo explicou Caballero, a actuación de todos eles estivo coordinada desde o CECOR, órgano do que a FEMP tamén formou parte.
Os recoñecementos serán recolleitos por representantes da Policía Local, tanto do ámbito de grandes cidades como de pequenos municipios; da Policía Nacional; Garda Civil; Sistema de Protección Civil; Mossos d`Escuadra; Ertzaintza; Policía Foral de Navarra; Policía Canaria; Forzas Armadas e Ministerio de Sanidade.
O acto, que será conducido pola Comisaria da Policía Local de Valencia e Coordinadora de GAMA (Grupo de Atención aos Malos tratos), Estefanía Navarrete; realizarase en presenza de membros do Goberno de España e tamén de Alcaldes e responsables locais das áreas de seguridade e sanidade, así como Senadores, Deputados e outras autoridades. O desenvolvemento da Homenaxe poderá seguirse en directo na web do Senado de España.
Caballero tamén acudirá a Madrid este mércores para a celebración dos actos do 12 de outubro. Ás 11 da mañá serán os actos na Praza de Lima, coa homenaxe á bandeira nacional e o desfile militar.